Jetz mues iich aber schlöinigscht mit em Siigrischt vo der Reformierte Chilche z Sissech reede. Iich wett iim nämmlig voorschloo, as är e Versteercher-Aalaag für d Chilche-Gloggen aaschafft. Iich sääg öich au graad worum. Wie all Joor hebe miir am Altjooroobe der Chopf zum Fänschter uuse, as miirs ghööre Zwölfischloo. Aber oohä. Hüür hesch s Glüt vo de Chilcheglooge numme ganz lyyslig vernoo, wills rings um öis umme gchlöpft und dätscht hed, as de fascht dubedänzig worde bisch. Drumm weers allwäg nit schlächt, me würdi ebe daas Glüt e chlyy versteerche. Daas hätti der Vordäil, as wiider mee Lüt würden uf d Glogge loosen und weeniger Säich in d Luft jätte – und s gub erscht no weeniger Güsel, wo uf de Stroossen und in de Gärten ummelytt.
s Glüt = Geläute
Altjooroobe = Silvesterabend
