Wiider emool äinisch chunnt der Rammel us syym Chrachen und macht sich uuf in die groossi Stadt. Er will wiider emool in der Wältstadt am Ryychnüü Kultur gniesse. Und soo goot er ins Münschter, wo der Baasler Gsangsveräin der Messias vom Händel git. In der Pause mues der Rammel ufs Hüüsli. Nooneme Wyyli findet er nääbenem Münschter e Brätterverschlaag, won em Gschmack nooch allwäg e Dualette setti syy – verstopft und ooni Wasser. Soo bim Wässerle dänkt denn dä guet Maa: E soon es gruusigs Schyysshuus häig er no nie aadroffe. Doo macht jo jeede Schoorgraaben im Ooberbaaselbiet e besseri Gattig. Nääbenyyne: S Konzärt isch e Bombe gsii.
wässerle = urinieren
Schoorgraabe = Jaucherinne im Stall
