Der Giuseppe hätt sellen apnee. Er hed efangen e schuurige Wanscht ghaa, won iim über e Hoosegurt aabe glampped isch. Nach langem Hii und Häär hed iin sy Dokter äntlig sowytt ghaa, as är zuenere Ernäärigsberooteren isch. An däm Daag, wos em Giuseppe syym Ranze hätt sellen an Chraage goo, hed er syy dollschti Schaalen uus em Chaschte gnoo und isch der Stadt zue. Aber diir glaubets nit: Die Berootig isch käini zwee Minute gange. Wo nämmlig der Giuseppe s Apnee-Frölläin gsee hed, wo öbben anderthalbmool so rund gsii isch wien är, säit er in syym holpprige Schwyzerdütsch: Es weeri allwäg besser, sii wurdi zerscht sälber e chlyy apnee. Jetz isch der Giuseppe wiider zfriide mit syym Ranze. Wies em Buuch vom Frölläin goot, hed er bis jetz nit uusegfunde. Aber woorschyynlig macht iim daas auch käi Buuchwee.
Wanscht = dicker Bauch
doll = schön
