Noodäm d Gschäftsbrüeffigskommission öisem Gsundhäitsdiräkter vor eme Zyttli oorteli an Chaare gfaaren isch, hed är sich die Wuche für daas, wo in syner Diräktion e chlyy drunder und drüber goot, verexgüsiert. Guet. So z grächtem hed er nit exgüüsi gsäit. Velicht hed er jo s Gfüel, er häigi nüt falsch gmacht. Äinewääg. Öbbis hed er aber glyych gsäit: Daas mit em mitenand Schwätze müesi scho no besser wäärde – und für daas häig er jetz jon e nöie, diiffige «Leiter des Informationsdienstes der Baselbieter Volkswirtschafts- und Gesundheitsdirektion» aagstellt. Iich bii zueversichtlig, as daas mit em zääme Schwätze guet chunnt. Schlussemänd isch dä «Leiter» jo lang myy Noochber gsii.
oorteli = ziemlich
verexgüsiere = sich entschuldigen
