Darf en äinezwänzgjöörigen Öschtryycher, wo Dragovic häisst, emene Bundesroot d Glatze dätschlen und e Wuche druufaabe Laaferizüüg vom Balkoon in d Gegend uuse weissge? Joo, darf är, wenn är Schütteler bim FC Baasel isch. Anderscht weers allwäg, wenn der äinezwänzgjöörig Öschtryycher, wo Dragovic häisst, zum Byspiil Chuchihilf im «Goldige Fingerbeeri» weeri. Aber woorschyynlig hätti d Chuchihilf Dragovic au gaar käi Glägehäit, öbberem d Glatze z dätschle. S äinzig, wo dä dätschled, isch s Rindsfilet, bivoor s in d Pfanne chunnt.
Laaferizüüg = Blödsinn
weissge = schreien
