Die letschte Wuche syy jo soumeessig wichtigi Fuessball-Spiil gsii. Gspässig. Syy bii deere Ginggerei zwee Schutter anenander groote, isch mäischtens äin uuf e Sack gheit und wien en apgstocheni Sou non e baar Mool über d Matte drooled. Miir isch daas e chlyy voorchoo, wie wenn me bii der Huusmetzgete d Fäärlimooren im häisse Wasser uuf die anderi Sytte drüllt hed. Der aadätschti Schutter, nit d Fäärlimoore, isch denn nooneme Rung wiider uufgstande, hed s Hoorband grichted und hed uus em «Beauty-Case»-Küfferli, wo iim der Pflääger uufs Fääld brocht hed, s Düübli mit em «Wange-Rouge» gnoo und e chlyy Faarp uufdräit – as au e chlyy e Gattig macht. Ah, fascht hätt ichs vergässe. D Yyshockey-Wältmäischterschaft isch au no gsii. Dört isch schon e chlyy rüücher zue und hääre gange – ohni Küfferli. Aber daas syy jo au käini Schütteler.
Ginggerei = Treterei
Fäärlimoore = Mutterschwein
