Daas isch jetz wiider son e bsunderbaari Sach. Am 25. Abrelle hed me der «Internationale Tag des Lärms» gfyyrt. Iich haa lang ummegstudiert: Macht me jetz an däm Daag bsuunders e huffe Läärm oder sett me eenter rueig syy? D Noochbere hed mii den uufkläärt. Am «Tag des Lärms» sett men ebbe graad käi Läärm mache. Jetz froog iich mii, worum me emene Daag, wo me käi Lärm sett mache, nit «Tag der Ruhe» säit? Me macht jo schlussemänd au käi «Tag der Ruhe», will me mee Läärm wett mache. Oder han iich doo emänd wiider äinisch öbbis falsch verstande?
läärmidiere = Lärm vollführen
Abrelle = April
