Öis Ooberbaaselbieter hets letschti Wuche allne e «Check Liste» yynegschneit, wie me sich bimene Atomumfall richtig aastelle setti. Also. Wenns nämmlig äinisch son es Atomchraftwärk in d Luft jätted, muesch äifach in Chäller – wenn den äine hesch und nit alles mit Wyyfläsche verschtellt isch. Bevor du dii aber wien e Chällerwäntele zruggziesch, settisch non e baar Sache mitnee. S weeri guet, de hättisch e Radio, e Wulldecki und e Teddybäär byy diir. Will iich aber käi Teddybäär haa, han iich dänkt, iich neemi myy Frau mit in Chäller. Iich hoff jetz numme, as me daas darf. Vo däm stoot nämmlig nüt uuf der «Check Liste».
yyneschneie = ungebetener Besuch
Wäntele = Wanze
