Doo wetsch süüferlig ins nöie Joor düüsselen und denn lääsisch in allne Zyttige: D Wält goot under. D Maya – näi, nit die Maya – d Maya vo Süüdamerika häige gsäit, im 2012 giengs nidsi. Au der Nostradamus gseechi hüür schwarz. S syyge jo schlussemäänd au scho Vöögel vom Himmel gheit und daas bedüti nüt Guets. Denn geebis au non e «Zombi-Apokalypse» und die Doote würde wiider uuferstoo. Halt: Miir längen äigedlig scho die «Zombi», wo lääbe, s bruchti käini nöie. Und s Verrücktischt: D Äärde sell nit nummen äinisch, näi, graad mee weder äinisch sell sii undergoo. Jä nundfaane. Wie denn? Wenn me dunden isch, chaa me doch nit no äinisch undergoo – he?
düüssele = schleichen
mee weder äinisch = mehr als einmal
