Nundefaane, daas isch aber es Hii und es Häär: Doo laufft äim jo d Chatz der Buggel uuf. D FDP (Waalkräis Sissech) isch soumeessig underopsi gsii. S isch schuurig lang gange, bis die gwüsst häi, wär jetz schlussemänd vonene as Landroot uuf Lieschtel goot. Die beeden äinzige, wos immer klaar gsii isch, as sii nit chönne, besser gsäit nit häi welle, syy die beede Fraue gsii. Denn ischs loos gange: Der erscht, wo hätt welle, hed vom Gschäft uus nit dörfe. Der zwöit hed gaar nit richtig gwüsst, öb är überhaupt dörfi, welle wurdi är scho – är müesi aber zerscht frooge. Der viert hed underäinisch e huffe z due ghaa und der fünft hed sich gfröit, wenn nämmlig der zwöit nit chönnti, cheem är underäinisch – wie d Jungfrau zum Chind – as schlächtischt Gweelten in Landroot. Iich hätt e Voorschlaag: Vor de Waalen apklääre, as me chönnti, wenn me denn dörfti.
hüscht und hott = in alle Richtungen
d Chatz laufft mer der Buggel uuf = mich schaudert
