Iich haa nuumen äi schloofloosi Nacht ghaa, won iich in der Baasler Zyttig (BaZ) glääse haa, as der birüemt birüchtigt Dänniker «Videofilmer» für e Bundesroot kandidiert. Die, wo schon emool äis vo syyne filmische Früewärch gsee häi, deenen isch sicher uufgfalle, as öbbe s äint oder ander Süschee e chlyy vergwaggled isch. Guet, wenn er uus em Helikopter filmt – und soo, wies uuf em Helgen in der BaZ uusgseet, macht er daas – chaas scho bassiere, as s Züüg e chlyy gwagglig derhäär chunnt. Aber soo, wies uusgseet, chaa halt e Gwaggli numme gwaggligi Sache mache. Aber öb daas für e Bundesroot längt? Miir wäi gwaggle – e luege.
Gwaggli = ungeschickter Mensch
gwagglig = wacklig
