Z Sissech hangt der nit gweelti Nationalrootskandidat Balz Stückelberger (FDP) no immer. Ganz elläi bambeled är, oder ämmel s Bild von iim no an e baar Ladäärnepfööl. Alli andere Mölderi – ämmel die uus Karton – hed me yygsammlet und duur e Maschiine gloo. Numme dä Stückelberger blyybt bockbäinig und loot sich ummsverwoorgge nit lo aphänke. Äigeldig es guets Zäiche. Äntlig e Poitiker, won e heerte Grind hed und sich nit so äifach loot loo entsoorgge – Huet ap! Nääbenyyne: Alli andere Chöpf, oder sell me sääge Volksverdrääter, syy vill gschnäller verschwunde gsii. Iich sääg drum numme: Stückelberger, draa blyybe.
Mölderi = Kopf
bockbäinig = stur
