S chunnt käi Sou druus. Bis an d Ständerootswaalen aane hed d CVPlere Elisabeth Schneider-Schneiter am SVPler Chaschper Baader käi guets Hoor gloo. Är syygi e Cholderi mitere Cholderiwaffle. Är syygi e Barteisoldaat, wo käi äigeni Mäinig häigi und numme daas miechi, was d Barteizentraale befiili. Derbyy gits in der Schwyz gaar käini Barteizentraale – daas gits jo numme no in Russland. Sii häi änander duraane d Hüener yydoo und änander Gutsi gee. Und jetz chaa men in der Zyttig lääse, as die gueti Frau Schneider s Gfüel hed, sii chönni sich der Baader denn scho no as Bundesroot voorstelle – ahaa, underäinisch!
underäinisch = aufs Mal
Cholderiwaffle = Mundwerk eines Polterers
