Velicht goots öich au esoo. Diir fröied öich, wenns in d Feerie goot, syt aber au wiider froo, wenn diir wiider dehäi syt. Joo. Au miir häi öis gfröit, wo miir do letschti vonere Räis us Öschtryych wiider zrugg in d Häimet choo syy. Miir, das isch e Tschuppele Frauen und Manne, wo gärn guet ässen und drinke. Miir gönge nämmlig all zwöi Joor zäämen uf e Wyyräis. Und wie sichs ghört, chauffe mer denn au e baar Guttere süffige Wyy. Und iich sääg öich: es chömmen e baar Fläsche zääme.
Uf der Häifaart ischs denn gsii wie immer: E Däil vo der Gruppe hed gschloofen oder duusled. Der äinzig, wo würklig wach gsii isch, isch der Schofföör gsii. Zum guete Glück, wäärdet diir dänke. Es isch äigedlig alles rueig und gmüetlig zue und häär
gange, bis miir an Schwyzer Zoll choo syy. Dört syy fümf stattligi Zöllner gstande. Äin dervoo hed e möörderlige Schnauz ghaa und zimmlig böös gluegt. Allwääg isch är der Scheff gsii.
Der Schofföör isch süüferlig aanegfaaren und hed wiene Häftlimacher uufbasst, ass er nit äim von deene Gränzlandjeeger über d Füess faart. Denn hed er d Schyyben aabegloo. Und scho hed dä mit em Schnauz der vergelschtered Schofföör aabällt: «Häit diir Wyy zum Verzolle?» Der Schofföör isch zimmlig verschrocken und hed ganz schüüch gsäit, joo. Er häig schon e baar Gutter derbyy. Jetz hed aber der Zöllnerscheff erscht rächt der Schnauz
gstellt und der Schofföör non e chlyy lüter aabälferet: «Dür uufmache. Ich chumm in Bus yyne.» Er isch nit würklig yynechoo – scho eender yynegstürmt. Denn isch er zvorderscht aanegstande, äi Hand an der Byschtoole, fascht wien en Oberscht am Hauptverlääse. «Alli, wo Wyy häi, uusen und die Sach verzolle. Iich chumm denn alles cho noochezelle.» Run, apdrätte!
Miir ischs e chlyy vorchoo wie, wenn amme der Santichlaus choo isch. S hätt numme no gfeelt, ass miir hätte müesen es Värsli uufsääge. Und alli die, wo käis hätte chönne, weeren us em Bus uuse duzwytt in d Chischte gheit worde. Uf der andere Sytte han iich aber au e
chlyy Beduure mit däm arme Zöllner ghaa. Es isch jo scho zimmlig verschisse, wenn me
daagdääglig versecklet und aaglooge wird. Wenn ganzi Waagelaadige vo Salami, Schungge, Wyy, Schnaps oder sünscht öbbis Gfeerligem, nääbe de Zöllner duuren in d Schwyz gschmugglet wird.
Aber miir, Gattligi wie miir emool syy, häi öisi Guttere verzollt. Und wil miir esoo Oorteligi gsii syy, isch der Zöllner mit em Schnauz allwääg au nit cho noochezelle. Oder velicht hed er au graad käi Zytt ghaa, wil er öbber verwütscht hed, wo drüü Wienerli über d Gränze hed welle schmuggle. Wär wäiss!
Äinewääg. Öbbis isch miir glyych e chlyy bsundrig vorchoo: Niemer vo öis hed nämmlig
müese sy Bass zäige. S hed fascht e chlyy uusgsee, ass s Gäld wichtiger isch, as z luege, wäär bii öis über d Gränze chunnt.
