Do letschti bin iich bim Yychaufen underäinisch vooremene groosse Chüelbüffe gstande. Iich sääg öich. Dört heds allergattig Züüg drinn ghaa. Aber ganz bsundrig häi mii dört druus schöön gattlig in Blaschtig yypackti früschi Fisch (Dorade) aagüggslet. Guet. Soo richtig güggslet häi die Fisch nümme. Syy sy joo schlussemäänd dood gsii. Äinewääg. Miir ischs Wasser im Muul zäämegloffen und iich haa dänkt, daas weeri emäänd no öbbis uuf e Grill. Iich nimm aso son es Päckli mit zwee deere Fisch uuse, cheers um und lääs hindedruff der Hiiwyys: Achtig. In däm Fisch chönnti Fisch drinn syy. Doo bin iich aber au fascht allergisch worde! Und iich bi froo gsii, as käi Gyyraff drinn gsii isch. Iich chumm nämmlig vo Gyyraffefläisch immer en Uusschlaag über.
güggsle: verstolen schauen
deere = solche
