S Feschtässe

Äigedlig weers um Zaale gange. Wie vill hed me verdient? Wie vill hed men uusgee? Waas isch fürig bliibe? Waas halt eso greedet wird, wenn e Bank yylaadet. Halt eender e chlyy drochnigi Choscht. Won iich so in d Rundi gluegt haa, han iich mii aafoo frooge, öb die ville Lüt nit eender wääge der andere Choscht, em Feschtässe choo syy. Soo wien e Däil nämmlig gluured häi, syy die häilfroo gsii wenn d Bankscheffe nit z lang über Zaale reede.
Und iich glaub, iich bii nit ganz falsch glääge. Chuum isch nämmlig der offiziell Däil mit Zaale übers vergangene Gschäftsjoor, enere singende Busschoffööse und enere Frau mit emene apsunderlige Dialäkt dure gsii, isch der Sturm uuf die gattlig deckte Disch loosgange. Wien e Laawyyne syy d Lüüt uus der Halle gstolperet. Soo wie die gjufled häi, häi die aaschyynend e soumeessige Chooldampf ghaa. Allwääg häi die mäischte die letschte drei Dääg nüt richtigs gässe. E baar häi au würklig e chlyy uusgmergglet uusgsee. Bim Kampf um die beschte Blätz isch dräängelt und gschüpft worde, wie am Uusverchauf bim Jelmoli oder bimene Konzärt vom Justin Bieber.
Wo sich denn alli gsäädlet ghaa häi, dieff duuregschnuft und nümme im Züüg ummegrangget häi, ischs loos gange. Diifigi Frauen und Manne, alli in verschiide faarpige Lyybli häi afoo s Drinke und s Ässe serviere. Guet. Bim äinten oder der andere hed me scho gmerkt, ass sii nit soo güebt syy im Däller ummenanderdrääge. Die häi nämmlig s Gschirr balangsiert, wie wenn e chineesische Akrobat im Zirkus Borzelaandäller uuf emene Bambustäcke jongliert. Aber es isch alles guet gange und niem vo de Gäscht hed d Voorspyys oder der Blauburgunder im Äckte ghaa.
Am Aafang, wo no niemer e volle Däller vor sich ghaa hed, isch s no zimmlig lut zue und hääre gange. Fascht e chlyy wie imene Hüenerstall. Alli häi duuränander bäälitschiert. Me hed sich schlussemäänd au es Joor lang nümm gsee. Wo denn aber s Fuetter, besser gsäit s Ässe choo isch, isch s alsfott rueiger worde.
Und iich sääg öich. S Ässe hed e uusgsuechti Güeti ghaa. Häärtöpfelstock, Gschnätzlets anere scharpfe Sosse und Rüebli mit e huffe Beeterli draa. Aber nit alli syy nit ganz zfriide gsii. Myy Noochber hed nämmlig brummlet: «Fäärn heds non e Duule im Häärtöpfelstock ghaa, as me mit der Sosse hed chönnen e Gumpi mache. Aber es isch halt nümm wie albe.» Aber sünscht syy alli am Disch z friide gsii.
Wie länger as gangen isch, wie lüüter ischs wiider worde. Der Wyss und der Root häi halt langsaam iiri Würkig zäigt. De Chöpf syy rööter worde und e Däil hed langsaam müese gegen e Schloof kämpfe. Scho glyy syy denn die erschte – zfriide mit sich und der Wält –  em Uusgang zue kruckled.
Alles isch guet gsii. Numme der Flängge Rindfläisch in der Zaanlucke hed non es Zyttli e chlyy gstört.