Noochaane

De stoosch am Wäärchbank im Faasnechtschäller, verliisisch wie jeedes Joor d Schruube, wo d Handwäärcher mee oder weniger süüferlig uus de Diilen und Brätter vom Faasnechtswäägeli gschrubt häi. Derbyy machsch diir so dyyni Gedanken über die vergangeni Sissecher Faasnecht.
Nääbenyyne: Hüür ischs Verlääse vo de Schruube non e chly aaspruchsvoller worde. Nöi han iich nämmlig nääbe de Chrütz- und Schlitzschruube no d Torxschruube müessen uuselääse. De muesch also scho dr Grind bii dr Sach haa. Äinewääg, es macht halt e jeede daas, won er am beschte chaa.
De stoosch also doo, chnüüblisch in däm Bärg vo Schruuben ummen und hangsch dyyne Gedanke nooch. De versuechsch dii draa z erinnere, wie jetz daas gsii isch mit der Sissecher Faasnecht. Joo. Zerscht chömme diir groossi, soumeessig groossi Wäägen in Sinn. Und fascht uf jeedem vo deene stattlige Wääge hets e Bar und e soumeessig luti Stereoaalag ghaa. Worum äigedlig? D Faasnecht isch doch käi «Street- oder Loveparade».  Und denn die Dracktör, wo die Barwääge zooge häi. Woori Unghüür! Wie hed doch e Zuelueger richtig gsäit: «Früener, wenn iich albe ha welle Landmaschiine go aaluege, bin iich z Sissech an Herbschtmäärt. Hüt gang iich für daas am Faasnechts-Sunndignoomidaag z Sissech uuf e Gmäiniblatz.»
Wie lenger as in däm Schruubebäärgg nüelsch, wie noochdänklicher wirsch. Nit wääge de ville verdräiten und vermorggste Schruube. Näi. De frogsch dii, worum alsfott mee Guggemuusiger under dr Larffe gschminkt syy. E Larffe würdi doch länge – mäinti! Bis jetz hed miir daas aber no niemer chönne zgrächtem verdüte.
Wo de scho fascht fertig bisch mit Verlääse, bängled dr Scheffmechaniker no äinisch es baar Dotzed Underlagsschyybli aane. Alli in underschiidlicher Grössi und Dicki. Jetz chunnsch fascht e chlyy in es Züüg yyne. In weeles Fächli sellsch die jetz wiider versoorgge? Apgschlaage, wien iich jetz emool bii, han iich gwaardet, bis käin me vo de Schruubfetischischten umme gsii isch und haa denn die Underlaagsschyybli in Chübel gheit. Me chaa jo s neecher Joor wiider nöi chauffe. Die uus China syy jo bsunders billig. Apropoo China und billig. D Goschtüüm von e Däil groosse Faasnechtsgruppe chömmen au alsfott mee vo China. Aber woorschyynlig syy die hiesige Schnyyderen au gaar nümm im Stand, die soo souglatte Goschtüüm (Römer, Schotte usw.) zääme zschnurpfe. Doo bruchts allwääg eben e diifige chinesische Schnyydergsell.
Noodäm alli Schruuben am richtigen Oort gsii syy, han ich nümm lenger wellen über d Faasnecht noochedänke. Aber wär wäiss. Velicht macht sich dr äint oder die anderi e baar Gedanke, was äigedli der woori Sinn vo dr Faasnecht weeri.