Doo häissts immer – ämmel nach Abstimmige – miir Baaselbieter wetten am liebschten under öis syy. Joo nüt gee und numme vo der Stadt profidiere.
Und jetz daas.
Doo liis iich doch, as mee Baaselbieter as Baaselstädter an der Baasler Faasnecht mitmache. Jä nundefaane. Wie gseech jetz daas uus, wenn nummen no Städter, e baar Zürcher, äinzelni Maarggrööfler und Secondos, wo d Ladäärne drääge, wurden am Cortége mitdipple? Allwääg es zimmligs chläis Schyssdräckzügli, so ooni d Baaselbieter.
Drum syy miir wiider aaständig mitänand und löies zääme lo fääge, oder wie der Städter säit: «zäme fägts».
dipple = marschieren
Maarggrööfler = Marktgräfler
