Wie rächt as sii doch häi, die vo dr Baasler SP. Natüürlig dörfe d Chinder im Zügs ummeschreie. Numme. Es wird halt alsfott schwiiriger für die Chlyyne mit Ummewüeschte. Miir häi amme no uuf em Häimwääg vo dr Schuel chönne d Sou uuseloo. Aber will d Chinder immer mee vom Mammi oder em Bappi mit em Auti vo dr Schuel abghoolt wäärde, isch nüt me mit Schreien und Ummesyyrache. Im Auti vom Mutti/Bappi wird nämmlig nit ummegschroue. Und wenn me d Eltere frogt, worum sii denn d Chinder nit löie vo dr Schuel lo häilaufe, häissts, daas syygi vill z gföörlig. Wääge de villen Auti. Wenn iich daas albe ghöör, dunkts mii, daas syygi z grächtem zum Schreie.
Häit e schööni Zytt – ooni vill Gschrei.
alsfott = immer
ummewüeschte = rumtoben
