Iich haa nie so rächt gwüsst, waas prezyys e Soujass isch. Wird dört jetz gsoued, e Sou apgmurggsed oder soumeessig gjassd? Aber sit letschtem Mittwuch wäiss ich s ganz gnaau. An sällem Oobe häi nämmlig vier gstandeni Manne in der Bäiz, won iich yygcheert bii gjassed. Oder besser gsäit, bim Jasse de Sou uusegloo. Die häi nämmlig änander die ganz Zytt übli Schlötterlig aaghänkt. S isch zue und hääre gange, wie wenn Söi in d School yynedriibe wäärde oder es Suggi kaschtriert wird. IIch haa mii fascht e chlyy gschäämd. Aber wüssed diir was s Bsunderbaarscht isch? Die vier Walchi füere de «Soujass» Mittwuch für Mittwuch duure. Gspässig, gälled
apmurggsen = umbringen
School = Schlachthaus
Walchi = ungehobelter Mensch