Iich haa mii soumessig gfröit. Äntlige häi sii uuf dr Boscht Chrütterööl im Aagebott. Iich maag gaar nit drübernoochedänke, wie vill Huusfrauen as scho ummesuscht uuf d Boscht gangen und fascht verzwyyfled syy, wills dört käi Chrütterööl ghaa hed. Jetz ischs sowytt. Äntlige. Jetz feelt numme no dr Chnooblech, früsche Basilikum, Piniechäärnen und Parmesanchees im Aagebott vo der Boscht. Denn bruchsch nämmlig nümm in en andere Laade go z boschte, wenn dehäi wetsch d Pesto sälber mache. Oder ischs emäänd anderschtumme. Häi die uf der Boscht, wo daas mit em Chrütterööl uusdüfteled häi, äifach öbbis verwächsled und gmäint, daas syygi jetz «Service public»? Also iich bruch käini Lääbesmittel uf der Boscht. Miir würds scho länge, wenn gnueg Schalter offe weere.
ummesuscht = umsonst
uusdüfteled = ausgeklügelt