Iich haa die wunderschööne, amerikanische Fraue mit iire dicke Lippe schoo immer bewunderet. Drvoo dröimt, as mir emool äini e dicke Schmutz git. Daas muess jon es unglaubligs Gfüel syy, wenn äim soo äini, mit Lippe wien en Orang Uthan, verschmützled.
Will aber niene son en uufbluschteriti Schöönhäit umme Wääg gsii isch, haan iich dänkt, iich due mir d Lippe – lueged ufs Foti oobedraa – sälber uufbloose. Halt soo öbbis wien e Sälbschtversuech mit Botox. Iich haa mir also son es Gepsi voll Botox und e Sprütze bstellt. Denn haa iich mir schöön süüferlig d Noodlen in d Lippe gstoche. Iich sääg öich, es hed soumeessig wee doo. Won iich denn no uuf dr Verpackig glääse haa, waas Botox überhaupt isch, han iich no vill mee Schmärze ghaa. Myy Frau hed am Aafang numme dr Chopf gschüttled, aber denn gmäint: Wenn denn no öbbis vo däm Züüg setti fürig syy, würdi sii denn au….!!
Dumms chäibe Züüg. Daas isch natüürlig alles Chutzemischt. Es isch alles vill äifacher.
Wie allewyyl am Ändi vo de Schuelferie häi mir öises Quartierfescht gfyyred. Alli syy luschtig gsii. Me hed giigeled, öbben e Schluck vom Wyyse gnoo und mir häi der hilmig Oobe gnosse. Bis, jo bis s Imbi choo isch. Nit iggs es Imbi. Näi. Es isch äis gsii, wo woorschyynlig nöimen ineren amerikanische Militärakademie e Noochkampfuusbiildig gnosse hed. Won iich nämmlig, nit gyytig, aber doch zümftig, in es Stück Drüübelichueche bisse haa, han iich gemerkt, as daas Imbi dä Chueche glyych gärn hed wien iich. Es hed syy Stachel uusgfaare – wien es daas z Amerika gleert hed – und hed mii in d Lippe byygsd. In däm Momänt isch mir wiider s Botox in Sinn choo. Nit nuumen in Sinn. Näi. Au in d Lippe. Wills aber chlyyni Chinder ummeghaa hed, han iich nit chönne druufloos brüele und haa dapfer uuf die dicki Lippe bisse. Und denn ischs loos gange. Um mii umme isch e riise Betriib uusbroche. Verbandschäschte syy füreghoolt worde. Yysbütel uus der Gfrieri grisse worde. Öbber hed mir Notfalldröpfli yydröifeled. Äine hed lut gschroue, me müessi allwääg em Chrankenauti aalüte oder no besser graad dr REGA. D Chinder um mii umm häi groossi Auge gmacht und allwääg dänkt, iich syygi e Held, will iich nit döigi brüele. Myy Liebschti hed mir dr Puls gfüeld und mir guet zuegreedet. E Chrankeschwöschter, zum guete Glück isch die voroort gsii, hed s «Notfall» mit öbbe 13 verschiidene Billen und Salbene voor miir uusbräited. Alli häi zue miir gluegd, as iich nit apsäärble. Und denn isch no äine gsii, e liebe Fründ, dä hed duurend Föteli gmacht. Wie son e halbwilde Chriegsfotigraaf. Richtig deegudant.
Woo denn d Erschtversoorgig duure gsii isch und sich d Laag wiider e chlyy normalisiert hed, isch underäinisch fertig gsii mit Mitläid. Denn häi sich alli numme no über myy dicki Lippe luschtig gmacht und dummi Sprüch grisse. Daas, iich mues es doo jetz sääge, hed mee wee gmacht as der Imbistiich.
Und iich? Iich haa numme dänkt. Mit deeren uufgschwullene Lippe chan iich allwääg dr ganze Oobe käi Wyy drinke. Und soo ischs au gsii.
