Doo seckle d Lüt an Roose-, Rhododendron-, Dulpen- und Daalienuustellige nöime z Dütschland oder z Holand, und bii öis dehäi wachsd der Läiterlichlee uf der Matte. Und daas chruusdick. Aber mäined diir, daas nimmt öbber wunder.
Der Läiterlichlee isch früener e wichtigi Fuetterpflanze gsii. Zue säälbere Zytt hed me die Pflanze bsunders de Ross verfuered. Hüt spanne d Buure numme no sälte Rösser yy. Hüt wird der Chuemischt mit em Draktoor underegfaare. Fertig grösseled.
Aber halt. Äis Ross, in öisem Fall e Chooli, gits no. Oder besser gsäit, wo sich uuffüert wie äin. Öise Noochber. Denn nämmlig, wenn er darf öisi Matte mäie. Mit äim chlyynen Underschiid zum Ross. Der Noochber isst käi Läterlichlee.
Läiterlichlee = Esparsette
chruusdick = üppig