Es hed zwar e Rung duured. Gnauer gsäit, 177 Joor. Aber jetz häis öis d Bebbi ummezaalt. Noodäm sii nämmlig – ebe voor 177 Joor – vo de Landschäftler an der Hülfteschanz schuurig äin ufs Dach überchoo häi, hed jetz – ebe 177 Joor spööter – e Baasler Durnerschwinger syy Geegner, e Baaselbieter Senn, ins Saagmääl drückt. Aber gälled, liebi Stedter. Jetz numme nit übersüünig wäärde. Numme, will jetz e Baasler Schwinger mitemene Griff – emene Buur – zwüsche d Bäi vomene Baaselbieter Senneschwinger e chlyy Saagmääl uufgwiirpled hed, wäi mir doch schöön am Boode blyybe. Äi Schwalb macht nämmlig no käi Summer.
übersüünig = übermütig
Schwalb = Schwalbe
