Doo han ich aber gstuunt. Mii heds nämmlig wunder gnoo, gäbs Woort «Verantwortung» au im «Baselbieter Wörterbuch» stoot. Dir glaubeds nit, aber iich haa daas Woort dört drinne niene gfunde.
Jä nundefaane, han ich dänkt. Häi denn Baaselbieter früener käi Verantwoortig ghaa. Syy die äifach ooni Gwüsse duur d Wält gstürchled. Häi doo e chlyy gschäfdet und dört öbbis vom Haag grisse. Ooni gross noochezdänke. Oder ischs velicht ganz anderscht gsii. Emänd häi sii äifach Verantwoortig übernoo. Im Guete, wie im Schlächte. Ooni, as sii häi müessen imene Buech noocheluege.
Nääme mir emool aa, e moodäärne Bankdirekter vonere grosse Schwyzerbank – e Baasler – hed daas Baaselbieter Wöörterbuech au glääse. Soo. Und wie will dä jetz wüsse, waas Verantwoortig isch, wenns nit in dem Buech stoot. Ebe!
gäb = ob
stürchle = stolpern
