Vom 15. bis am 18. Meerze isch z Baasel d Wuche vom Hiirni duuregfüert worde.
E huffe gschyydi Lüt häi übers Hiirni dischgeriert. Näi. D Froog isch nit gsii, wär wien es grosses oder überhaupt es Hiirni hed. Für daas hätt d Zyt jo nie glängt. Es isch under anderem drum gange, waas im e Hiirni abgoot oder worum, wenn öbbis abgoot, s esoo abgoot und nit anderscht. Aso nummen öbbis für würklig gschyydi Chöpf.
Ich bi natüürlig nit so gschyyd, wundere mii aber, worum as dä Aalass «D Wuche vom Hiirni» ghäisse hed. Wenn me nämmlig richtig zäämezellt, hed die Hiirniwuche jo numme vier Dääg duured. Und e Wuche hed doch siibe Dääg. Oder öbbe nit?
Oder isch doo emänd mys Durschnittshiirni scho überfordered?
Meerze = März
dischgeriere = diskutieren