Alles, wo me z übersüünig macht, chaa giftig syy. Syyg daas, wenn me zvill Bätziwasser lüttered, ooni Suurstoffmasken uf e Mount Everest seckled, 27 Rösslistümpen am Daag raucht oder vier Kilo Roonechrutt ufs Mool aabewangschted.
S glyychlig ischs au mit der Byyse. Z vill Byysen isch Gift. Es friert äim an Mölderi. D Auge föngen afoo drääne und de hesch duurend e Dropf an dr Naase.
Soo. Wenn den aso nit wetsch, as dir dr Byyswind umme Chopf wäit, blyybsch halt dinne. Und wenn de nit wetsch, as di s Roonechrutt dööded, ässisch halt käis, oder numme ganz jungs, und joo nit vier Kilo ufs Mool.
Soo heds ämmel myy Vatter gmacht. Und er isch drbyy alt worde.
übersüünig = übertrieben
wangschte = runterschlingen
