Nundefaane. Jetz weeri öise Bärner Regierigsroot bygoscht fascht ins Cheefig choo. Numme will er emene Zunzger e chlyy d Lefyte glääse hed. Wo cheemte mir au aane, wenn jeede, won e emene andere Schlötterlig aahänkt in d Chischte chiemti. Doo weeri jo s Bundeshuus die halbi Zytt leer.
Drumm bin ich froo, as der Regierigsroot uus em Ämmedaal nit ind Chischte hed müesse. Was hätt dä dört au die ganzi Zytt gmacht? S Anne Bäbi Jowäger vom Jeremias Gotthelf glääse. Wer wäiss. Iim hätte doch im Cheefig die ville Apéros, Yyladdige, «Tennis-Tournier» und was süscht no so zum Regiere ghört gefeelt. Gut. Er hätti im Loch Zytt gha, e chlyy mee nooche z dänke. Aber wer wäiss, was denn wiider uusechoo weeri. Drum. S isch scho rächt, wies isch!
Cheefig = Gefängnis
Lefyte = Strafpredigt