Jetz heds doo letschti z Sissech e chlyy gschneieled und beieled. Nummen e fyyne Huuch. Nüt Verruckts. Und scho chunnt vo de Städter die immer glyychligi Froog: Gäll, jetz häit dir z Sissech sicher huffewyys Schnee?
As äis für äismool gsäit isch. Basel lytt uf öbbe 240 M.ü.M. und Sissech uf öbbe 340 M.ü.M. Und dorum lytt au käi meterdicks Yysmeer zwüsche Basel und Sissech. S hed bi öis au käini Yysbääre, käini Pinguin und e käini Karibu. Mir woone nit in Iglu und chöien nit uf geedrigem Robbefläisch umme. Mir machen au käini Löcher in die gfrooreni Ärgolz zum Yysfische. Mir chaufe d Fisch im Konsi. Näi, näi und noomoll näi. D Wintersingerhöchi isch au nit wääge meterhööche Schneewächte gsperrt und s hed au käi Schyylift (me) uf der Sissecher Flue.
Nundefaane. Isch das denn soo schweer zum Verstoo!
beiele = schneien
äismool = einmal
