Durneroobe

All zwöi Joor s glyychlig Brimborium.
Dr Durneroobe stoot aa und alli Durner setten an däm Oobe mitmache. Glyych öb de Gsüchte hesch. Numme chönnsch im Bassgang tschiengge. Diir bi jeeder Beweegig dr Buuch in Wääg chunnt. Es wird mitgmacht, besser gsäit mitdurnt. Es bruucht alli. Spööteschtens, wenn dr Ooberdurner mitere Lyschten in der Luft ummefuchtled, wäisch, jetz gülteds ärnscht. Uf däm Blatt settisch du dii nämmlig yydrääge, wenn den am Durneroobe wettisch mitmache. Aso. So richtig welle duet jo äigedlig e käine. Drumm blybt die Lyschte zerscht au zimmlig leer. D Lyschte blybt wyss und s Gsicht vom Ooberdurner wird bläich. Soo. Jetz gits jo verschiideni Wääg, as me nit uf die Lyschte chunnt.
Wenn dr Scheffdurner s ersch Mool mit däm Fötzel chunnt, cha me sich äntwääder blööd, übelhöörig oder düüpelhürnig stelle. Au e gueti Maschen isch, graad in däm Momänt, wos ans Yyschryybe goot, uf s Hüüsli zgoo. Die ganz Raffinierte chömmen äifach in deere Zytt, wo d Lyschten im Umlauf isch, gar nit cho durne. Die sääge sich nämmlig: Solang mii dr Oberdurner nit gseet, chan är mii au uf käi Lyschte setze.
Aber am Schluss, so öbbe nach zwee, drei Wuche, isch d Lyschte denn doch no voll worde.
Au daas isch all zwöi Joor s glyych. As nächschts wird verlääse. Die, wo nit uf dr Lyschte syy, die Alte, Gebräächlige, die grööschte Gstaabi – zue deene ghört au der Schryyberling! – und süscht Aagschlaageni, durne vo jetz aa in der Halle zwöi. Mit deene macht men äifachi Üebige, daas, wo syy halt chönne, ooni as sii nochhäär überall Müssi häi.
In dr Hallen äis syy die, wo dörfe/selle/müessen am Durneroobe mitmache. Aso, die durnerische Spitze vom TV Sissech.
Und denn foot d Üeberei aa.
Der Reschissöör hed nöime non es alts James Last Kassettli gfunden und dehäi in dr Stuben e schmissige Räigen uusdüfteled. Und daas, wo sich dr Voordurner in Chopf gsetzt hed, sette jetz die arme Durner in e baar Wuchen usswändig chönne. D Geduld vom Yypäitscher wird uuf e heerti Broob gstellt. Woorschyynlig nimmt er vor jeeder Durnstund e Daabletten oder e zminscht e Schluck Grappa.
Aber, au daas isch wie allewyyl. Zletschtemänd chunnt doch no alles guet. Dr Ooberdurner isch zfriiden und d Durner uuf der Schnuure. Jetz gubs natüürlig au anderi Wääg, wie men e glatten Oobe chönnti duurefüere. Ooni Lyschte, ooni vill z üeben und z schwitze. Me läit die ganzi Durnhalle mit Gurit uus, loot föif Guggemuusige lo schränze und sticht es baar Fässli Bier aa. Der neecher Daag muess me denn numme mit emene Füürweeschluuch die letschte Bsoffenen und d Biergumpenen uusesprütze, und alles isch wiider guet.
Soo äifach isch daas. Wenig Uufwand und vill Gwünn. Aber daas isch halt denn käi Durneroobe me, und daas weeri jo au schaad, gälled!