Daa syy no Burschte, z Hääfelfing. Jetz häi dyy bis hüt ooni «Handy» überläbt und niemer heds gmerkt. Will die soo im ene Loch huuse, längd d Verbindig – ämmel die ooni Drööt – nit bis dört aane. Wenn denn e Buur doch emool, will e Chue am verwäärfen isch, muess em Veedokter drootloos aalütte, muess de arm Käärli doo derfür uf e Hübel chräsme.
Soo. Und jetz chunnts.
Velicht isch daas en Erkläärig, worum s Zunzge au son e Hübel, dr Zunzger Büchel stoot. Wäär wäiss. Emänd häi scho d Germaane, wenn syy häi welle im Konsi e Wildsou bstelle müesse uf e Hooger styyge – aber woorschyynlig ooni «Handy». Wenn me dr Zunzger Büchel emool zümftig würd zunderopsi graabe, wäär wäiss, underäinisch cheemti velicht en uusghöölte Zaan vom ene Käiler füre – dr Voorläufer vo öisem «Handy».
chräsme = klettern
zunderopsi = drunter und drüber
