Myy Frau fröit sich schon es Zyttli uuf d Ööbe, wenn wiider s Füür, besser gsäit s Holz, im Schweedenoofe läädered und s iire so richtig souwool isch.
Wie sichs ghört, mach ich s Füür. Mir Manne chönne das äifach besser – glaub ich ämmel!
D Speenli syy uus hiesigem Chien und d Schytli uus em Bürgerwald. Holz uus em Sissecher Bann git halt graad noo äinisch so warm.
Numme bi de Zünderli han ich e chlyy es schlächts Gwüsse. Das isch e nämmlig e chlyy e dyffysyyli Sach. Won ich nämmlig äinisch uuf s Schachteli gluegt haa, will s myy wundergnoo hed, wohäär die Zündhölzli denn äigedlig chömme, bin ich schon e chlyy verschrocke. Gmacht wäärde die nämmlig in Ungarn, uus Kanadischer Bappele und denn – woorschyynlig – im e Laschtwaagen uus Lettland mit eme Faarer uus Kasakstan zu öis übere gchaared.
Aber gälled. Mit normaale Zünderli cha jeede und jeedi Füür mache. Ebe!
Wenigschtens s groobe Holz isch vo doo. Und drum darfs au myynere Frau glyychwool wool syy.
Zünderli = Zündhölzer
hiesig = von hier