Es isch schon e Dunnerwätter, öise Regierigsroot us em Ämmedaal. Jetz cha dä doch würklig Japanisch. «Kyô, koko ni minasama o omukae deki», hed är zum Gouverneur vo Toyama bim Nachtässen im Baad Schaueburg gsäit. Jetz wäiss allwääg käi Mensch, usser de Japaner, was das häisst. Äinewääg. Aaschyynend isch dr Ämmedaaler imene Japanischkurs, woorschyynlig son ere Crash–Schnällbläichi, gsii.
Chinesisch chan er jo scho. S chunnt äim ämmel esoo voor, wenn är öis d Schuelreform brobiert z erklääre.
Und jetz, won är fascht alli Asiatische Sprooche ergmäischtered, hätte mir im Baaselbiet e Soufröid, wenn är – ändlig – au öise Dialäkt chönnt reede oder zminscht verstoo.
Setti är Hilf bruuche – ich bi baraat. Er hed jo myy Deelifoonnummere.
Kyô, koko ni minasama o omukae deki = He Gouverneur, noochhäär gönge mir uf em *Chall no gon e Lääberwurscht ässe.
*Chall = Bergrestaurant Kallhof, Eptingen
ergmäischtered = beherrschen
