Wos so gschütted hed, was aabe hed mööge, ha ich dusse grilliert. Jetz han ich s nämmlig allne deene zruggzaalt, wo mii allbott wääge myym Gaasgrill uusglacht häi.
Um mii umme häi d «Hardcore-Griller» brobiert, die füechti Holzchoole oder die nasse Speenli aazmache. Sie häi wie die Verruckte in d Motthüffe bloost, bis sie e ruessigi Chürpse ghaa häi.
Denn isch dr «Chef Gril de gaz» – das bin ich – vor d Dür drätte. Hed dr Deckel vom syym Gaasgrill uufegmacht, s Gaas uufdrüllt, Füür gmacht, dr Deckel wiider zuegmacht und isch yyne gon e Schluck Barolo nee.
D Holzchööleler häi immer no an iire Spaarflämmli ummegchüüderled.
Nach öbbe fünf Minute isch dr Scheff zum zwöitemool an syy Gaasgrill drätte, hed es zümpftigs Stück Fläisch uuf e Rooscht gläit und isch yyne gon e wyttere Schluck Barolo nee.
D Holzchööleler häi fueternyydig übere gschiiled und dr Gäifer isch ene aabegloffe.
Denn hed dr Scheff s Fläisch drüllt, hed e grosse Schluck Barolo gnoo, s Fläisch ab em Grill gnoo und isch yyne.
Nääbedraa isch nach emene Zyttli dr Pizzataxi aanegfaare.
chüüderle = hätscheln
fueternyydig = neidisch
