Guet. De machschs jo freiwillig. Aber es isch halt schon e Souchrampf, s Wellofaare zääme mit de Kollege. S Schlimmscht isch aber amme, bis men alli Faarer zääme hed.
Früener hed me gsäit, am Zääni dört und dört und es syy alli dört gsii. Hütte startisch en SMS-Umfroog.
Zerscht goot emool gar nüt. Achti am Moorggen isch halt no oorteli früe. Noodysnoo määlde si sich denn doch no, die äärzi. Und denn. Tuusig Uusreede häi si.
Äin hed Migräne. Ich sääg numme: Grappa! En andere sett no Härdöpfel uusdue. Äin isch erscht grad uus em Näscht drooled und cha erscht in zwee Stund und nach eme Dreiminuten-Äi cho faare. Denn isch no dä, wo mit dr Frau zääme muess Gumfidüüren yychoche. Em en andere Joomeri ischs s Wätter z unsicher und äinen isch früsch verliebt. Dä hed für alles Zytt, numme nit zum Wellofaare.
Ich bi denn doch no go faare – eläi!
oorteli = ziemlich
noodysnoo = mit der Zeit
Bäärzi = häufig stöhnend
