Myy Frau luegt immer, as ich mit öbbis Vernümpftigem beschäftiged bii. Drum hed si mir
do letschti fümf Kilo Chiirssi zum Uusstäine gee. Si miechi denn noochaane d Gumfidüüre scho, hed si no gmäint.
Uusstäine. Das isch natüürlig äini vo de lyychteren Uufgoobe für mii. Nach em ene Zyttli studiere han ich aber gmerkt, worum myy liebi Frau miir die Frücht gee hed zum Uusstäine. Mir häi nämmlig käi Chiirssiuusstäiner. Ich ha mi aber nid lang hindersinnt und mi zruggbsinnt, as myy Groossmuter s Chiirssiuusstäine mit ere Stricknoodle gmacht hed.
Ich ha my ganz süüferlig an d Aarpet gmacht. Ha jeedem Chiirssi äinzel dr Stäi uusegstoche. Mit em Ergääbnis, as nach öbbe fümf Minute d Chuchi und ich vo unde bis oobe mit Chiirssisaft vollgsprützd gsii syy.
Sit denn chaufe mir d Chiirssigumfi wiider im Glaas.
noochaane = nachher
hindersinne = grübeln
zruggbsinne = sich erinnern
