Bis hütt hed jo niemer so richtig gwüsst, worum bim Yychaufe dr Maa ummsverworgge muess derbyy syy.
Ich root öich, chömmed äinisch am ene Samschtigmorgge z Sissech in dr Begeegnigszoone cho luege, denn wüssed dirs.
Wo früeijer amme Sämfte duur d Stroosse buggled worde syy, gutschiere hütte blächigi Bänne vo äim Parkblatz zum andere.
S wird yyparkt. Hinderzig. Denn wiider fürsi. E chlyy zrugg und e Schlängg nach linggs. Denn stoot d Göppse richtig. D Muetter verloot fluchtaartig dr Waage – dr Schofföör hed halt äimool mee d Parkschyybe vergässe – chauft zwö Schoggistängeli und wäibled zrugg zum Chaare. Denn uus em Parkblatz uusechnorze und bim nöchschte Laade wiider yyne – lueged äifach oobe! Numme diismool boschted d Muetter viervierlig Schwartemaage – am Stück. Soo goot das dr halb Morgge.
Aber s Ganz hed au öbbis Guets. D Muetter muess nit tschiengge, dr Vater hed öbbis z due und ich ha öbbis z schryybe.
Bänne = Auto
hinderzig = rückwärts
fürsi = vorwärts
