Es isch öbbe zwöi Joor sythäär. Aber wie immer, mir hed mes jo nit glaubt.
Dä Regierigsroot, wo sich an jeedere Hundsverlochede dr Buuch vollschloot – nääbenyyne, er isch nit dr äinzig – muess maagere.
Schunggegipfeli, Wurschtwegge, beläiti Bröötli. Alles so fettigi Choscht. Und denn die Lütterei. Schämpis, Wysse, Rote, Bier.
S hed nit chönne guet uusechoo und es isch nit guet uusechoo.
Jetz hed iim allwääg d Frau d Hüener yydoo. Immer wiider nöi Hoose. D Hemmlichrääge syy au immer mee abgschabbt. S oberscht Chnöpfli hed är ämmel scho lang nümm zuebrocht. Nundefaane, das wird am Moorggen alben e Chnüblerei gsii syy. Und denn d Grawatte. Me hed iims vo wyttem agsee, as die iin alsfot mee worgged.
Und jetz muess er maagere. Näi. Nit uuf mii loose. Äifach druufloos wangschte.
Stäärneföifi. Mir syy doch doo nit im Ämmedaal.
maagere = abnehmen
sythäär = seither
wangschte = schnelles, unkontrolliertes
