Willi, soo häisst dr Hund vo s Noochbers. Es isch e stattlige Burscht. Äin, wo zwüscheduuren au emool belfered. Nit son e Fluumer, wo uusgseet wien es motorisierts Gnaagi.
Es isch es Zyttli gange, bis mir zwee so richtigi Kammeraade worde syy. Zum richtig Fründe mache, han ich iim drum zwüschenyynen öbben e Schnääfel Fläisch gfuered.
Joo, bis doo letschti.
Doo han ich iim d Abschnitt vom ene früsche Gitzilääberli zum Frässen aanegee. Jä nundefaane. Mäinet dir, dä Tschooli hätti das Gschläck gnoo? Ummsverwoorgge nit. Er hed syy füechti Naase grümpft und isch hoffäärtig dervoo zottled. Ich bi doo gstanden und ha überläit, öb ächt d Hünd numme no Rindsfilet ässe. Oder hät men ächt s Lääberli sellen im Anken aabröötlen und es Cognacsöössli derzu mache?
Nach däm Aplöscher bin ich mir jetz au gar nümm sicher, öb ich wytter em Willi syy Gspoon will syy.
belfere = bellen
Fluumer = kleiner, langhaariger Hund
hoffäärtig = überheblich
