Dir chönned öich sicher no zruggbsinne. In der Primaarschuel häi d Mäitli amme sones «Vergiss mein nicht» ghaa. Dört dryy hed me denn selle oder besser gsäit müesen, öppis dryyschryybe, wone Gattig gmacht hed. Iggs e gscheite Spruch, oder no schlimmer,
e Zäichnig.
Äigedlig haani aagnoo, hüt geebi s käini deere Poesialbümer me. Aber ooha lätz. Bis miir bim «Facebook», frei übersetzt s «Gsichtsbuech», der Eermel yynegnoo hed. Für alli die, wo nit wüsse, wass «Facebook» isch, doo der Versuech vonere Erkläärig:
Also. Wenn der dehäi e «PC» (Daateveraarpäitigsgräät) häit, chaa s syy, ass öich underäinsich öpper Bekannts oder au Wildfrömds schrybt und öiche Fründ oder öichi Fründyn wett syy. Das isch in groobe Züg s «Facebook».
I sääg öich. Doo luegsch aber am Aafang schone chlyy sältsem in d Wält.
Us häiterem Himmel, will underäinisch em Noochbersbueb syy Fründyn au myy Fründyn syy. Derbyy isch die eerscht fümfezwänzgi und i bi doch en alte Maa und eerscht no ghüüroote. Was myy Frau zue däm allem säit – wenn sii Wind dervoo überchunnt – hed mer e mängi schloofloosi Nacht bereited.
Wo my nöii «Fründyn» denn wiider emool nääbedraa z Bsuech gsii isch, bini ganz schüüch go frooge, öb daas richtig syygi, ass sii jetz myy Fründyn syygi. Sii häig doch schone Fründ, haani gsäit und das syg doch äigedlig no ganz e Gattlige. Si wiird e chlyy bläich
und säit, das syygi dänk nit esoo gmäint. Si syygi nummen en elektronischi Fründyn. Zeerscht – i mues es doo jetz äinisch sääge – bini schone chlyy niidergschmättered gsii. Haa miir denn aber überläit, wie daas ächt uusechoo weeri, wenn die nones Buschi
vo miir hätt welle.
Denn isch s Schlaag uf Schlaag gange.
Der Fründ vo der Fründyn – joo, die mit em Buschi – hed mii fründlig elektronisch aagfrogt, öb äär au myy Fründ dörffti syy. Jä nundfaane, haani dänkt. Jetzt woone miir scho 25 Joor nääbenänand. Miir syy doch scho lang Fründe. Aber nacheme Zyttli noochedänke, haan au iich s gmeerkt. Es git halt zwöierläi Fründ: woori und elektronischi.
Us der ganze Wält häi jetz unbekannti Mensche mit miir welle Fründschaft schliesse. E Yakrinderhirt us Nepal hed mer gschriibe, äär syygi jetz grad bim Yysammle vo dröchnede Yakpflätter und es würdi iin soumeessig fröie, wenn er myy Fründ dörffti syy. Guet, haani dänkt, es chaa nit schaade, wenn men in der Nööchi vom Mount Everest e Fründ hed. Me wäiss jo nie, wo s äim no aaneschloot. Denn isch e Fründschaftsaafroog vomene Welloflicker us Afgooye (Region Shabeellaha Hoose, Somalia) yydroffe. Für mii isch schnäll klaar gsii, wenn äin in sonere Region läbt, mit somene gäile Naame, mues er äifach myy Fründ syy. Drotz ass es e chlyy wyt äwäägg isch, zum myy Göppel z flicke.
Druufaabe isch d Mäldig vonere hübsche Teegünnere – joo, me chaa die Lüt au aaluege, wo äim schryybe – us Samabeong/Darjeeling, Indien, yynegschneit. Sit denn drinki numme no Schwaarztee – ämmel fascht! Äifach us der ganze Wält, syy d Aafrooge numme so yynebräägled. I haa um s Ummeluegen e Huffe Fründ und Fründyne ghaa.
Wenni mer s jetz aber so richtig überlegg, isch miir dää Fründ, woni chaa mit em reede und in d Auge luege– zum Byspiil am Samschtig im Caprice – immer no der Liebscht. Stelled öich voor, i müesti jeede Samschtig nach Somalia räise.
iggs – irgendein
ämmel – jedenfalls
