Doo heds aber grääbled. Derbyy han ich numme gsäit, ich häigi dr Ooschterflaade mit Ryys lieber as mit Griess. Ums ummeluege ischs fertig gsi mit em Friide, und dr Karfrytigskarpfen isch mir vor luuter Schreck fascht im Hals blyybe stecke. E richtigen Ooschterflaade miech mit Griess und Wyybeeri und nit mit so apsunderlige Sache wie Ryys, hed äine gäitsched.
Nundefaane, han ich dänkt. Dä muesses jo äigedilg wüsse. E Sunndigschoch, wo no nie sälber e Chuechedäig gmacht hed, aber e Schnällbläichi im Däig uuswaale – bi dr Betti Bossi. Wo denn my Muetter au no aagfange hed, iiri Grossmuetter häigi scho und so wytter und so fort, han ich öbbis vom ene Groot im Hals aafoo brummlen und ghofft, es geebi käi Oschterflaade zum Desseer.
Dir chönned jetz äimool roote, was es gee hed. Richtig! Mit Griess.
rääble = rumoren
absunderlig = absonderlich
