Manne, syy mir doch graaduuse. Die mäischte vo öis syy nit die ganz grosse Chrampfer in dr Chuchi. Emänd öbben emool e Päcklisuppen überdue. Das weers denn scho gsii.
Jo, bis denn d Freiluftbröötlerei zgrächtem loos goot. Denn isch fertig luschtig für d Huusfraue. D Manne wäärde zue woore Grillmonschter. Und denn, nummes s Düürscht isch ene guet gnueg.
Yakgnaagi. Chrokodillhoode. Okapiäckte. Gnuschungge. Lachsbäckli. Giraffelääbere. Äifach nüt Normaals. Und denn d Würscht. Die duet me (=Maa) nit numme so äifach yyschnyyde. Näi, d Würscht wäärde verziert. Was häisst doo verziert? Die wäärde reegelrächt gschnitzt.
Wuchenänd für Wuchenänd, wenn d Grillzytt uuf em Gipfel isch, lüüchdet denn dr Himmel rooseroot, vo de riisige Grillfüür. Fascht wies Polarliecht chunnts äim mängisch voor.
Nummen öbbis isch halt immer no wie albe: D Frau dörfe nach dr Schlacht am Grillroscht wie immer s ganz Buff verruume.
graaduuse = ehrlich
zgrächtem = richtig
