D Sunne hed heerlig gschunne. Doo han i dänkt, ich hock für e Momänt uuf äis vo dene gattlige Bänkli in dr Sissecher Begeegnigszoone.
Um mi ummen isch e Bedriib gsi wie im ene Imbihüüsli. Auti, vill Auti syy hii und häär gfaaren und häi e freie Parkblatz gsuecht. E vergelschteridi, alti Frau, scho ganz zum Hüüsli uus, heds nach öbbe drei Aaläuf gschafft, über d Strooss z chruckle.
Ich ha mi aber vo settige Nääbesächlichkäite nit lo ablänke und ha d Uussicht gnosse. Das häisst, wytt han i läider nit gsee. Wenn i uufgluegt haa, han i diräkt an en Autidüüre gstierd.
Nach emene Zyttli han ich aber Glück ghaa. S Auti voor myynere Naasen isch uus dr Parklucken ewägg gfaare und es nöis isch aanegstellt worde. Wunderbar, han i dänkt. Es anders Modäll, mit andere Düüren und en ere andere Faarp.
Und jetz sell no öbber sääge, das syyg käi schööni Uusicht.
Imbihüüsli = Bienenhaus
vergelschtered = verstört
