D Stroosse syy – so nach der Faasnecht – wiider halbwägs suuber. Numme doo und dört gseesch öbbe no öbber, won e baar Konfetti vom Fänschtersimse chnüübled.
Aber es git no äis grosses, unglöösts Ghüselproblem.
Won ich nämmlig do letschti hinder emene Schindlebygger dryygloffe bi, loot doch dä Griss e ghöörigi Laadig Rossböllen uf d Strooss lo pflättere.
As Hundehalter würdisch di jetz schääme wien e Hund und dä Huffe geschwind im Blaschtigsäckli lo verschwinde.
Aber uf em hööche Ross isch das öbbis anders. Bis die nämmlig albe vo iire Chläpper aabegchnorzet syy, bisch du, wo hindedryy gwagglisch, scho längschtens in dä Huffe tschalpped.
Und jetz sell mir niem choo wääge Rossböllen im Roosebettli und esoo. Alles dumms chäibe Züüg. Wär duet denn hütte no Rossbölle zäämelääse? Ebe!
halbwägs = einigermassen
Schindlebygger = ausgemergeltes Pferd
Griss = graues Pferd
