Jetz güggele si wiider uuse. Fyyni, grüeni Spitzli luegen under em Laub füren und gluure dr Sunnen entgeege.
E wunderbaari Zyyt, wenn me die erschte Ramsele cha äärnte. Duurs Laub düüssele, as me jo nit uuf die junge Schoss tschalpped. Duraane schmöckts herrlig nach Knoblech und füechte Bletter. Es Baredyys.
Und denn cha me jo e huffe gluschtigi Sache dermit choche. Früschi, hiesigi Spaargle mit emene warme Ramselenanke drüber. E wäärschafti Ramselesuppe oder, dir glaubets nit, schyymber cha me d Ramsele au in Schnaps yylegge.
Nummen uuf zwee Sache muess men aber partuu Achtig gee: Erschtens, as käi Hund über d Ramsele brünnelet hed und zwöitens, as me se nit mit em Roonechrut verwächsled. Spööteschtens denn nämmlig, wenn dir ufs Hüüsli gönged, gspüred dir dr Underschiid zwüsche deene beede Chrüttli.
Ramsele = Bärlauch
Roonechrut = Aronstab
schyymber = scheinbar
