Jo. Läider hed me hüür d Belleryyne an dr Faasnecht bruucht.
Au wenn s numme lyycht döiled hed, ischs allewyyl wiider e riise Gschyys, bis die guritigi Belleryyne under em Goschtüm füere gchnüübled gha hesch. Wenn se denn ändlig über d Chürpse brocht hesch, ooni as dr die ganz Beerügge vertschuppled, bisch dr vorchoo, wien e Bluetwurscht in ere durchsichtige Hut. Nach emene Zyttli, schiffts dir bi den Ärmel yyne und dr Schwäiss lauft dir dr Äckte duurab.
Wenn s denn uufghöört hed säiche – zum guete Glück – zwängsch die wiider uus der pflätschnasse Blaschdighut. Wenn den das, nach ville Verränkige gschafft hesch, muesch die Belleryyne wiider esoo chlyy zäämelegge, as sie wiider in d Hoosedäsche basst. S Ganz isch e Riisechrampf.
Und genau vo däm, lääst me nie öbbis in dr Faasnechtsbrichterstattig.
döiele = leicht regnen
gchnüübled = hervorgeklaubt
vertschupple = zerzaust
