Nundefaane. Doo wird jo dr Ruun uf dr Milch suur. S Blochers häi wiider zuegschlaage!
Äigedlig müesste d Rahmtäfeli uus Gälterchinde jo Ruundääfeli häisse. Aber will das im Räscht vo dr Schwyz niemer verstoot, häisse sie halt Rahmtäfeli. Halt nit ganz richtig, aber guet syy si äinewääg!
Und jetz zäigt sich äinisch mee, as me nit gnueg cha Achtig gee, wenn öbbis vo Züüri chunnt. Underäinisch häisse nämmlig d Baselbieter Rahmtäfeli – Basler Original!
Mit däm Schangschiere vom Name rysst men öis Oberbaselbieter es Stück Karamellzucker uus dr Seel.
Stelled öich äinisch vor, e Basler Mässmogge weeri underäinisch e Baselbieter Määrtmokche. Oder no schlimmer. An dr Sissecher Chluuriverbrennig wurdi dr Zürcher «Böögg verbrännt».
Ebe!
Ruundääfeli (Baselbieter Spezialität) = Rahmbonbon/Rahmtäfeli
(in weniger hoch entwickelten Gegenden wie z. B. Zürich = Nidlezältli)
Herkunft «Ruundääfeli» siehe http://www.kulinarischeserbe.ch
