Ich hoff, dir häit guet gnöijoored? Häit, wie jeedes Joor, gueti Voorsäätz gfasst? Abnee? Weniger drinke? Mee Beweegig?
Dr häit am Daag noch em Noijoore nit z vill Rollmöps bruucht, wäägen em billige Fuusel, wo dr am Oobe vorhäär glütteret häit. Oder häit dir emäänd gar käini deere suuri Fisch bruucht? Kchomplimänt. Dr Maagen isch immer non e chlyy underobsi und hed lyyslig vor sich aane grugget. Isch nit schlimm. Chunnt in de beschte Familie vor. Dir häit jo dr Chropf vom Nöijoorswegge, güüftig mit Anken und Himbeerigumfidüüre druff, chönnen ässe, ooni as öich obsi cho isch. Hoff ich ämmel! Und zum Nachtässe? Dir häit scho wiider Gluscht uf e gueti Guttere Barolo gha. Ich mags öich gönne. So isch richtig.
Nääbenyyne. Anke? Barolo? Gueti Voorsäätz? Ich mäin numme. Wäägen em Abnee und esoo!
Häit es gfröits 2009 zäämen und dänket draa: Boorzet nit z vill im Züügs umme. S wird alles guet – oder ämmel nid schlächter.
Nöijoore = Neujahr feiern
Chropf = Anschnitt
boorze = sich mühsam bewegen
