Bi dr Füürweer hört dr Gspass halt uuf.
Das hed au dr Landvogt vo de Chrüüselidöörnbuure – dr ehemoolig Chruttlämpe Regierigsroot Straumaa – müesse merke.
(Nummen nääbenyyne: Wenn äin uus em Chrutt chunnt, gits halt öbbe zwüschenyyne Lämpe).
Iim syy nämmlig an der letschte Gmäini d Chienspöön und d Füürweerschlüüch nummen eso um d Oore gflooge. Derbyy hed er s numme guet gmäint – wie alben im Regierigsroot. Es nöis Füürweerauti und es Füürweermagazin bruuchis z Herschbrg nit. Ohalätz. Do isch er aber an die falsche groote. Sie häi iin aagifdelet und iim Schlötterlig aaghänkt, as em Straumaa s Chiini immer wytter aabegheit isch. Si welle mit niemerem dr Füürweerweier däile. Scho gar nit mit de Graubüntel. Z letscht hed no äin zuen em uufe gäiferet: Das isch öises Füür und das löie mir is vo niemerem Frömds lo lösche.
Rächt häi sie – d Herschbrger
Chrüüselidöörnbuure = Hersberger
Chruttlämpe = Wintersingener
Graubüntel = Arisdorfer
