Äigedlig ischs Äänisbröötli es ganz es äifachs Gutsi. Staubzucker, Määl, Äier, Äänis, Kirsch und vill Liebi. Fertig.
Aber ohalätz. Es isch nämmlig immer e Sach gsi, wenn d Muetter alben um d Wienecht umme deere Gutsi gmacht hed. S Mische, s Chnätte, s Uuswaalen und s Uusstächen isch s äinte. Dr grossi Momänt isch denn nämmlig s Bache gsi. Süüferlig hed si s Blääch mit de schöön aanebyygeleden Äänisbröötli in Oofe gschoobe. Und denn isch si vor em Bachoofe blyybe stoo und hed gspäärberet – richtig – as d Füessli vo de Gutsi schöön graad wäärde. Und ich sääg öich, syy die Füessli übereggs uusechoo, isch d Stimmig in dr Chuchi zimmlig aagspannt gsi. S hed käi Muggs verdräit.
Öis Bueben ischs aber zimmlig glyych gsi, öbb die Gutsi schieffi oder graadi Füessli gha häi. E Güeti häi si allewyyl gha.
späärbere = spähen
übereggs = schief
Muggs = Mucks, kaum hörbarer Laut
